Zarîfe û Elişerê roca ma

by rcadmin

HELÎN ÜZEL

Zarîfe û Elîşer hete Kurdane ra zê qehremanan yenê dest girewtiş û yad kerdiş. Zarîfe merdime xo Elîser reyde zewicyena.
Elîşer serra 1914’ine dest bi kar û xebatanê seba azadîya Kurdistanî keno. Rusan reyda pêdîyayîşan virazeno û bi Ermenîyan reyde têkîlî ronano.
Elîşerî Serra 1919’ine de Cemîyeta Tealî ye Kurdistanî rê nameyeke erşawite û vat: Kurdê Dersîmijî û Koçgîrijî zî giredayeyî cemîyete yê.
Bi destpêkerdişe îsyane Kocgîrî yê serra 1921’ine, Elîşer beno fermandarê artêşa Serrewedartişê ya Şarê Koçgîrî. Bi qerare orte ra wedartişê Elîşerî yê Enqera û bi sebebe ixanet û teslîmkerdişe eşîran, serra 1921’ine de Elîşer û Zarîfe keyeyê xo benê Dersîme û wêra zî, her tim bi Seyît Riza reyda mîyane tekîlîye de yê. Wexto ke Dewleta Kemalîste ya TC êrîşê Dersime kerd, Zarîfe û Elîşer zafêrê veciyayî vernî. Elîşerê zê fermandar û roşenvîreke, her cayî de şerreko bi bandor da domyayîşî.
Zarîfe zî lejvananîya xo reyde cinîyeka zana û avervînayî bî. A zî Koçgîrî ra bî. Aye bi Elîşerê qehreman, helbestvan û rametoxe dawaye Kurde bewarîya xo ardebî. Zarîfe cinîya ke rigeş, meymanperwer û serefiraze bî. Dersîme de tewrê xeylê kombîyîşanê polîtîkan bî û bi fikrê xo hedkarî day. Cîyayîya maberê camêrd û cinîyan re qet serreyê xo cot nêkerd. Seba Zarife wuna vanê ‘A şêra ke wextê xo de wendiş û nuştiş zanayê bî, reyna cinîye ka sîyasî hem ya Kurde bî.’
Elîşer verîya ke kareko bikero, her tim fikrê Zarîfe girewtêne. Elîşerî bê fikre Zarîfe qet qerar nêdayêne. Zarîfe lejvaneke bî û xeylî cinîyan aye reyde şerr kerd. Verîya ke dest bi şerr bikerû teyreyde perwerdeyîya silahan dî.
Bi sebebo ke têkilîya Zarîfe û Elîşerî bi Seyît Rizayî reyda xurte bî, îxanetkero bi nameyê Rayberî, înan ra aciz bi û dexesîyayê. Raybero xayîn ke hete Enqera ra amebi erinayîş, bi ajane dewlete.
Zarîfe û Elîşer nîşaneyê hereketê xoserîya Kurde bîy. Coka dewlete bi rayîra îxanet û xapinayîşî waşt înan orte ra wedaro. Zarîfe û Elîşer serra 1937’ine de bi îxaneteke, şikefte Palaxîne yê koyeyê Tijik Bavayî de hete Rayber û Zeynelî Qotî ra amey qetilkerdiş.
Êy welatperwerane ke seba xelisnayîşe şarî Kurde cûyeyê xo da, bi zilme kolonîyalîzmî amêy qetilkerdiş. Bi bêehlaqî û hovîtîye…
Dewleta Tirke ya îşgalkere seba qetilkerdişê verkişane Kurdan xelatî dayêne. Xalata serrêye Seyît Rizayî ra dime xelata teir pîle seba serrêyê Zarîfe û Elîşerî bî.
Qetilkerdişe Zarife û Elîşerî ser ra 90 serrîy derbas bî. Gerîlayê ke torinê Zarîfe û Elîşerî yê, ewro tenê Dersîme de nê, çar perçeyanê Kurdistanî de verva dewlete îşgalkere xoverdayîşeko destanî pêk anê.
Îxanetkere zê Rayberî hema zî mîyanê Kurdan de est ê, la torinê Zarîfe û Elîşerî ewro koyanê Kurdistanî de bi qerardarî, verva îxanetkar û îşgalkeran xo ver danê. Êy, verkêşê doza azadîya Kurdan Zarîfeyan û Elîşeran bi tu awayî xo vîrî ra nêkenê.
Bi no sebeb, gere welatpawêrê Kurdî her tim Zarîfe û Elîşerî bi vîr bîyarî. Hem înan bişnasnê û hem zî rayîra ro îxanet û xayîntîye bigerê. Gere heme domananê welatpawêran bi estanikanê Zarîfe û Elîşerî reyde pîl bibe. Gere her keynayêka Kurde bibo yew Zarîfe û her lajêko Kurd zî bibo yew Elîşer.

You may also like